Kolumbien – Adiela Argote

Nächst Réischterung den 2. Oktober, nächste Versand de 4. Oktober!

Argote Geschicht

Wat wier, wa mir eppes anescht mat eisem Kaffi maache géifen? Dat ass d’Fro déi de Juan Pablo sech gestallt huet, wéi säi Papp den Efraín grad d’Kaffisfarm vun der Famill verkafe wollt.

Wat wier, wann ech zréck op d’Farm plënnere géif? huet de Juan Pablo sech geduecht, deen zu där Zäit an der Staat gelieft huet.

Papp a Jong hunn ugefang hire Kaffi selwer ze “processen” also ze schielen an dréchnen an hunn de Kaffi selwer geréischtert a lokal verkaf. 

2014 huet mäi Kolleeg de Lennart vun This Side Up de Juan Pablo kennegeléiert. Kleng Erklärung: De Lennart ass ee vun den 3 Grënner vun This Side Up, d’Importatiounsfirma zu Amsterdam mat där ech zesummeschaffen. 

2 Joer méi spéit, hat d’Famill Argote hier eegen Exportlizenz, wat et hinnen erméiglecht direkt un This Side Up a quasi direkt u mech ze verkafen. An hunn och nach ugefang hire Kolleegen, der Muñoz Famill, ze hëllefen hire Kaffi ze processen an ze exportéieren.

Dernieft huet d’Argote Famill ugefang een “Barista Field Trip” unzebidden. Do komme Baristas a Kaffisenthousiasten aus der ganzer Welt zesummen a schaffe mat op der Argote Farm. Des super Erfarung wäert ech och dëst Joer materliewen, wann ech am Juni a Kolumbien reesen. 😀 

Adiela Argote

D’Adiela ass 83 Joer al an dem Juan Pablo seng Tatta. Säit iwwer 30 Joer ass d’Adiele Wittfra an huet 3 Duechteren, dovu sinn 2 Léierinnen zu Génova an eng schafft zu Bogotá (Haaptstad vu Kolumbien). D’Adiela schafft vill a këmmert sech em d’Kaffisbeem, Plantanen, Hénger a d’Mëllechkéi.

Ech freeë mech schonn immens drop d’Adiela am Juni kennenzeléieren a Kaffi mat him ze drénken!

• Ugebaut zu: Colón Génova, Nariño, Kolumbien
• Altitude: 1950-2000m
• Goûten: Schockela, Nëss, wierzeg, rouden Apel
• Varietéit: Castillo, Caturra, Catuaí
• SCA score: 84 vun 100 (ganz gutt) 
• 100% Arabica
• wéineg Saier a Mo schounend
• Vun Hand gepléckt
• Fair gehandelt

De Juan Pablo Argote stellt sech fir.