Tanzania – Amkeni

OPGEPASST: Mir sinn am Congé! Du kanns weiderhi Kaffi bestellen. Däi Kaffi gëtt an der Woch vum 26. Oktober geréischtert a verschéckt!

De Kaffi kennt vun der COOP Amkeni aus dem Duerf Mwika dat am Hang vum Kilimanjaro läit. Amkeni besteet aus 45 Kaffisproduzenten déi säit 1999 zesummeschaffen an hire Kaffi zesumme verschaffen. Well Amkeni de Kaffi onofhängeg verschafft, hu si vun Ufank un ee groussen Effort gemaach eng gutt Qualitéit Kaffi ze produzéieren. Dësen Effort huet sech 2001 ausbezuelt wéi si den Certificate of Best Coffee vun der Tanzania Coffee Association kritt hunn. Säitdeem hunn se ëmmer weider un der Qualitéit vun hirem Kaffi geschafft an de Kaffi ass vu Joer zu Joer besser ginn. Allerdéngs hunn d’Produzenten laang Zäit fir hier gutt Qualitéit keen extra Geld kritt, well de Kaffi wéi all anere Kaffi un de lokale Marché verkaf ginn ass zum Präis dee vun New York (Commodity Market) virgi ginn ass. Amkeni hat 2 Optiounen: entweder d’Qualitéit vum Kaffi rofsetzen an net méi esou vill Arbecht mam Kaffi hunn oder den direkten Access zum Marché fannen an uerdentlech bezuelt ginn.

Glécklecherweis, fir eis all, hu si This Side Up kennegeléiert (mäin Importateur aus Holland) déi hinnen Accés zum europäesche Marché erméiglecht hunn an déi déi produzéiert Qualitéit ze schätze wëssen a mat méi Geld belounen. Heiduerch huet de Produzentenzesummeschloss elo d’Méiglechkeet Geld an hir Produktioun zréck ze investéieren,  besser de Kaffi ze verschaffen an hir Buroen ze renovéiere. Et ass eng Win – Win – Win Situatioun: Amkeni huet méi Geld, This Side Up ka bessere Kaffi vermaarten an du an ech drénken nach besseren Kaffi. 😉

Virun e puer Joer hunn ech och 2 vun de lokalen Akteuren vu Wanza (Exporter) am Tanzania zu Mailand kennegeléiert. De Frank an d’Rebecca këmmeren sech suwuel ëm d’Produzenten vun de verschiddene Kooperativen an och em Agroforestry Projeten op de Plantagen vun de Produzenten.

Bei dësem Kaffi handelt et sech em een zimmlech komplexe Kaffi mat immens ville Goûten déi laang am Mond nokléngen. Ënnerenanem fënnt ee Goûte vu Schockela an Nëss, mee och méi funky Goûte wéi gedréchent Friichten an Hammbieren.

• COOP: Amkeni
• Ugebaut zu: Mwika, Tanzania
• Altitude: 1600 – 1725m
• SCA Punkten (Skala bis 100): 86.35 Punkten (exzellent)
• Goûten: Schockela, Nëss, gedréchent Friichten, Hammbieren
• Varietéit: Bourbon, Jackson Bourbon
• Prozess: Gewäsch
• 100% Arabica
• Vun Hand gepléckt
• Fair gehandelt